नाशिक जिल्ह्यामध्ये सटाणा तालुका आहे. हा भाग पुर्वी बागलाण म्हणून ओळखला जात असे. आजही अनेकदा याचा उल्लेख बागलाण असा केला जातो.

सटाणा या तालुक्याच्या गावापासून ईशान्येकडे नामपूर हे गाव आहे. या नामपूरच्या वाटेवर कर्हे नावाचे लहानसे गाव आहे. या गावाजवळच कर्हेगडाचा किल्ला आहे. हा किल्ला स्थानिक लोकांना अपरिचित आहे. स्थानिक लोक याला भवानीचा डोंगर म्हणून ओळखतात. कागदपत्रांमधील माहीतीच्या आधारे १९८७ साली घेतलेल्या एका शोध मोहीमेमध्ये कर्हेगडाचे स्थान निश्चित करण्यात यश मिळाले. याच मोहीमे दरम्यान या भागातील दुंधागड तसेच अजमेर हे सुद्धा किल्ले असल्याचे आढळले.